Il tesoro incantato della Zisa

'Na vota cc'era e cc'era un Principi chi avía 'na figghia 'nta la batia di Santa Catarina. 'Nta la batia di Santa Catarina s'avía a fari un munacatu; cci parsi di beni a la Batissa di diri a la figghia di lu Principi di mannàri nni sò papà, pi quantu cci 'mpristassi 'na pocu di cannileri, piatta e cosi d'oru e d'argentu priziusi, pi guarniri la Chiesa e la càmmara unni s'avía a fari stu munacatu; e accussì la batia putía fari figura. Hannu pigghiatu a dui facchini chi sirvìanu a la stissa batia, e hannu mannatu a la casa di lu Principi, a nnomu di sò figghia e di la matri Batissa. Li facchini, 'n cànciu di jiri a la casa di lu Principi, sgarràru; e si jeru a tèniri a lu palazzu di la Zisa. Tuppuliaru, e cci affacciau 'na specia di criatu: – «Chi vuliti?» dici. – «Stà ccà lu Principi tali?» – «Gnursi.» – «'Nca manna sò figghia e la Signura Matri, ccà cc'è stu bigliettu, e nn'havi a cunsignari li cosi d'oru e d'argentu pri lu munacatu: nui semu li facchini di la batia, ca lu bigliettu lu dici, e nni pò cunsignari ogni e qualunchi cosa.» – «Ora vegnu» (dici lu criatu). Ddoppu un pezzu torna cu du' carteddi tanti di cosi d'oru e d'argentu massizzu, cannileri, càlaci, speri e tuttu chiddu chi cchiù si putía disidirari, cu petri domanti e petri priziusi grossi e belli mai visti. – «Tini', dici, purtàtili a la matri Batissa, e la salutati a nnomu di lu Principi.» Accussì ficiru. La matri Batissa e la figghia di lu Principi nni ficiru 'na festa granni, e cu tutti ddi gran tisori d'oru e d'argentu cci ficiru 'nta lu munacatu 'na gran figura riali: tutti guardavanu alluccuti e dicianu: – «Gesu! sti cosi mancu lu Re li pussedi!» Basta, a la finuta chiamanu arrèri a li dui facchini, cci jìnchinu li dui cartidduna tali e quali com'eranu, e cci li mànnanu a lu Principi. Li facchini jeru a lu solitu palazzu di la Zisa, e tuppuliaru. Veni lu solitu fattu a criatu e grapi. – «Tiniti ccà, dicinu li facchini, la Batissa manna li so' tisori a lu Principi e l'arringrazia tantu.» Lu fattu a criatu nun cci dava l'arma a pigghiarisi li cartidduna, e taliava a li facchini. Chisti taliavanu puru, e locchi locchi cci dicinu: – «Pigghiativilli e vi li cunsignati si su' giusti.» Lu criatu li taliau arrèri, si pigghia li carteddi, e senza vulirisilli cunsignari si metti a tistiari e cci dici: – «Quantu fùstivu minchiuna!» e comu dici accussì, spiríu cu tuttu lu palazzu, e li du' facchini si truvaru fora di Porta Nova. – «Oh, dicinu, e com'è sta cosa? com'è ca semu ccà?» – «E va spìjacci!» Traseru, e turnaru a la batía senza mancu avvirtìricci cchiù. Ddoppu jorna la Principi va e va a la batía. – «Oh, Signur Principi, quantu cci sugnu ubbrigata!» dici la Signura Matri. – «Oh, papà, dici la figghia, chi bella figura chi mi ha fattu fari 'nta la batía! quantu ricchizzi mai visti! e unni l'avía, ca io nun cci l'haju saputu mai!» E accussì tutti li monachi ringraziavanu e facìanu elogi e ossequii a lu Principi. Lu Principi si sintía pigghiatu di li Turchi: – «Ma chi diciti? Ma di chi mi parrati?...» Dumanni e risposti, cci dicinu lu fattu. – «Io nu nni sacciu nenti, dici lu Principi; cu' è chi v'ha mannatu cosa? Spijamu cchiuttostu a li facchini unni jeru.» Chiamanu a li facchini: – «Comu va stu fattu?» e chiddi cuntanu unu di lu tuttu, e macàri l'ultima palora di lu criatu, e comu abbinni ca spiríu e si truvaru fora Porta Nova. – «Ah! dici lu Principi; fùstivu minchiuna veru! Ddocu la Zisa è, unni cci sunnu tutti li gran tisori 'ncantati di li diavuli, tisori ca nun cc'è aguali pri tuttu lu munnu. La sorti era vostra; stu pussenti bancu s'avirría sbancatu, e vuàutri, locchi, nun vi nni sapistivu apprufittari! Ma un juornu si sbanchirà, e quannu si sbanca, tannu arricchisci la cità di Palermu.