Il contadino e le cento facce del re

Signuri, si riccunta ca 'na vota cc'era un viddanu. Sti viddani, cci nn'è chi hannu la testa fina veru, e pi giudiziu 'un cci havi a dari cumanni nuddu. 'Nca stu viddanu facía la sò jurnata e tirava du' tarì lu jornu; quattru belli patacchi di carrinu ca jinchìanu 'na manu. (Ora avemu sti cintìmuli, ca su' 'na ricchizza!...) Comu pigghiava la sò jurnata stu viddanu turnava a la casa, e java dicennu: – «Un carrinu mi lu manciu, un carrinu lu scuttu, unu l'aggiru, e unu lu jettu.» Ogni jornu la stissa canzuna. Successi ca 'na vota lu scuntrò lu Re; dici: – «A tia, chi veni a dici sta cosa?» – «Maistà, io cci lu cunfidu a Sò Maistà: un carrinu mi lu spennu pi manciari io; un carrinu la spennu pi li me' figghi; un carrinu lu dugnu a mè patri, ca mi mantinni sina chi criscivi; e l'àutru carrinu lu dugnu a mè mugghieri; e chistu è un carrinu persu.» – «Zittu, cci dissi lu Re; chiàntati; ca sta cosa mi servi pi fàrinni un 'nniminu. Tannu l'ha' a diri quannu tu vidi pi un cintinaru di voti la mè facci.» Eccu ca chiama a li so' Ministri, e cci pruponi stu 'nniminu. Li Ministri ch'avìanu a 'nniminari!... Jàvanu nni lu viddanu, e lu viddanu, pipa! Ch'era minchiuni! Un Ministru di chisti si cci misi tantu a pìttima pi diriccillu ca lu viddanu 'un ni potti cchiù; 'na jurnata cci dissi: – «Ora vuliti chi vi lu dicu? datimi centu dduppii di munita d'oru, e io vi lu cunfidu.» Comu di fatti, lu Ministru cci cunta li centu duppii e lu viddanu cci cunfidò lu sigretu di lu 'nniminu. Lu Ministru, tincu tincu, si nni va nni lu Re: – «Maistà, lu 'nniminu veni a diri chistu, chistu e chistu;» e cci lu spijò tuttu. Menti pi mia. Nna li dduppii di munita d'oru cc'era stampata d'un latu lu regnu, di l'àutru latu la facci di lu Re. – 'Unca lu viddanu comu l'appi si li misi a passari tutti una pi una sti muniti, guardannu prima lu latu unni cc'era lu Re, e poi osservannusilli cu tutta la sò 'simurtura. Veni lu Re, com'appi addiminatu stu 'nniminu, e si fa chiamari lu viddanu. – «A tia, dici, e accussì 'siguisti l'ordini mei di 'un svilari lu sigretu a nuddu si prima 'un vidivi centu voti la mè facci?!» – «E io 'un fici chistu, Maistà?» – «Comu, chistu? si tu cu sta vota m'ha' vistu du' voti?» – «Nonsignura, Maistà: io prima mi fici dari centu duppii di munita d'oru; e tannu cci cunfidai lu sigretu, quannu vitti la sò facci supra tutti li centu muniti.» – «Ha' raggiuni!» dissi lu Re, alluccutu di lu ciriveddu di stu viddanu.