La pera che salvò il mercante

'Na vota cc'era un mircanti chi java viaggiannu pi li so' mircanzii. Stu mircanti quannu arrivava nna quarchi paisi s'arripusava, e java nna quarchi lucanna; ma quannu cci scurava 'nta li pedi, s'avía a'rristari unni s'attruvava, macàri 'nta un voscu. Ora 'na vota, 'nta di l'àutri, mortu di lu sonnu si jittò sutta un pedi di piru e si misi a dòrmiri. Li latri l'abbistaru; dici: – «Picciotti, prisa cc'è; jamu!» e s'abbiàru nni stu poviru mircanti. Ora st'arvulu era càrricu di pira, ca ognunu pisava menzu ròtulu l'unu, ed eranu belli maturi. Cc'era tantìcchia di vintareddu, e li pira pinnuliavanu, e javanu di ccà e di ddà. Unu di sti pira, rùmpisi lu piricuddu, ppuhm! e cci scoppa supra lu nasu. Lu mircanti sata 'ntra l'aria; va pi jisari l'occhi e vidi li latri chi vinìanu pi iddu. – «A mia vuliti?!» allippa, e santi pedi ajutatimi! E di ddocu nni vinni lu 'nniminu chi dici: Pinnìculu pinnàculu pinnía, S' 'un era pi pinnìculu pinnàculu muría.